بندقية ابوفليجة
ابوفليجة من العرب الرحل عنده بار وغنم وساير مع الناس لكين المرفعين والبراعص أذن العرب حار والعرب بجاوكيهن الا بالحراب لكين ابوفليجة شاف الحربة ما بتخوف البراعص حار هيا ابوفليجة فكر يجيب ليا سلاح يرفع بيه من بهايمه هيا طرد لي تيران مشي باع ليه بندقية جابها الفريق الناس يوم شافوها كل زول بمسكها بالفرج فيها باقي يوم سعى البندقية قليل العنده بندقية هيا ابوفليجة إلا كتر حندابه 😂 بالبندقية ومن شدت ما عاجباه قطع ليها اسم سماها الحبشية لكين ابوفليجة زول خطاي يوم واحد ما ضرب صيدة يوم يمرق للصيد العيين بسألن المرق للصيد اتو؟ كن قالوا لهين ابوفليجة بقولن ايه توا بجفل إلا الصيد وبجيكوا بي سماح الوصف ..وصحي كلامهن وصاف حار🤣 .
يوم قاعدين مثل دا ابو فليجة قال لي أخوه ضوالبيت : يا اخوي البرعص كتل لي بارة والمرفعين كمل الغنم كمال توا اليوم تعال نسوي لينا تكل في شارب الرهد ونحرس المغضوب دما يجي وارد نلحق حده نريح الناس منه ضوالبيت وافق شالوا المحافير من العصر حفروا التكل طب وهيا بعد صلاة العشاء مرقوا مشوا دخلوا في التكل ونحن رقدنا
يوم أصبحنا انا جيت جاري لي ابوفليجة لقيته قاعد في الضراء ها قل ليا شنو ؟ قال : لي من مرقنا منكوا هني عنينا التكل عديل اندسينا داخل وقطعنا الحركة طب ولا حس ما في قعدنا كي دما اليل انتلت كو ضوالبيت نام وانا زاتى جاتني لي دقسة شوية كي كدر جاتني فكرة وفتح عيوني بشوف اتنين براعص وردن بلقن في المي ساكت إلا جلغ جلغ جلغ قلبي دا بسمع بتبتبت بت بشيش لكز ضوالبيت قل ليه المغضوب داكو جاء وهيا ضوالبيت فتح وعرك عيونه زين ورفع رأسه بشيش دما شافن تنتين براعص ها قال لي أنا بقبض للمناكي واته اقبض للدوناي واحرسني دما أعد تلاتي نضرب سوا قل لي خلاص وقبضنا شويه بسمع ضوالبيت قال واحد اتنين تلاتة وقالن رت بشوف هنا ضوالبيت إلا بالمرمق هني إلا بر دلب وبر دلب وحقي انا شوف عيني الحبشية اكلته طلقت ليه نار حمرة في سفيفته وقام بها بر طب برطب برطب شقا بيها الصارية حقت اخوي حمدان دي وعد عليك في قوز جملي ومعرد عني بيها خور المناقو داك نار حمرة في سفيفته دما اندرق بيها عشك 🤣🤣.
في شوفكوا كي ابوفليجة صاب البرعص ولا خطي؟
منقول
